شكراً على إختيارك ,,
وإعذريني على صعوبة فتح المدونة لأن السيرفر صراحةً سبب لي صداع ,,
لكن إن شاءالله ما يستمر على هذا الحال ,,
الشكر لك مرة ثاني يا إلهام على جهودك العظيمة والمميزة ,,

الشكر لك وتعليقك البسيط والعفوي يسعدني كثير وإن شاءالله راح نشهد مواضيع أكثر في المستقبل القريب ..

أخوك,,
فاضل مرعشلي,

أبد والله ما سوينا شي بالعكس يابوحمد كسبناك معنا ومناقشتك لي كان لها جميل الأثر على توضيح أفكار عدم الإنحياز والحياد وغيرها في النقاش وحقوق الإسم هذي عليك انا ما فيني حيل الصراحة .. علي كتابة المضمون وأنت عليك تشوف لنا دار النشر والمكتبة اللي بتوزعه ..

يسعدني انه أعجبك الموضوع .. بالنسبة للحياد كمفهوم .. فبدون أي تعقيد .. نقدر نعتبر انه هدف .. لا انا ولا انت تقدر نوصله .. فوشهو الحل؟ الحل هو اننا نرضخ للحياد الواقعي .. شي شبيه جداً بالنموذج اللي ذكرته .. وكونها هل طلعت معي كذا أو كيف بالظبط فأنا أطمنك اني أقدر بكل سهولة اني أكون أحادي الرأي وأرتاح وأريح .. لكن هل كل الناس يوافقوني وقتها؟ العالم مهوب انا وانت بس .. العالم انا وانت وفلان وعلانة .. يعني الناس موب ملزومين انهم يسمعون رأيك أو رأيي إذا ما كان يوافق ميولهم لأي سبب كان .. هنا تبدأ “مسيرة الحياد” على قولتك وترى عاجبني الإسم شكلي باسجله في وزارة التجارة باسمي واسمك يمكن نقدر نطلع بمشروع رواية ولا كتاب ولا شي من ورا مواهبك يابوحمد .. عموماً نرجع .. ليه أساساً الحياد كفكرة تتخذها في مناقشاتك؟ .. لاحظ اني قلت مناقشاتك .. لأن المقال تقدر تعبر فيه بحرية أكبر عن نفسك .. لكن المناقشة فيها طرفين مباشرين .. ما عندك نفس المرونة وقتها .. أولاً .. الحياد مو معناته انك تلغي ميولك .. لأنك ما تقدر واذا قدرت فأنت راح تخفيها مو أكثر .. لكن الحياد يقدر يعطي ميولك وآراءك مرونة .. يخليك تشوف الأمور بمنظار جديد عليك .. لكن بدون ما يضرك ويغير من آراءك تماماً لأنك وقتها لك انك تعرف ان قناعاتك ما كانت مبنية على اساس صحيح اذا بكل سهولة تتغير .. فأنا لو أوصل مرحلة أقدر أنثر المعطيات أمامك .. معطيات لأي قضية بدون أي مؤثرات أو بهارات عليها .. وأجعلها “محايدة” بمعنى الكلمة .. فأنت وقتها ما تقدر إلا انك تواجهها وراح تغزو أعماق تفكيرك بسهولة .. لسبب بسيط .. وهو انها هذه المعطيات لو انك حسيت انها فيها تحيز ضدك فأنت راح ترفضها مباشرة .. لكن لما تحس ان هذه المعطيات ما جابت خبرك فأنت راح تستسلم لها ولمضمونها .. مجرد أسلوب لتخطي الحواجز اللي تغطي اعماق العقل .. لكنه أسلوب صعب ولا أنا ولا غيري ممكن نظبطه لأنه في النقاشات الجادة صاروا الناس ما يرضيهم إلا اللي يبون يسمعونه .. هنا لعبتك .. انك تقدر تحسس الشخص اللي امامك بأنك منتب ضده ولانتب معه لكنك مثل اللي يفرش الطاولة بمعطيات القضية ثم يقول يالله يا جماعة شوفوا وضعكم مع السالفة .. انت اكيد ان عندك ميولك لكن مجرد كونك غير عنيف وغير مباشر في المواجهة فالطرف الآخر ما راح ينتبه لك .. للطرفين .. لك وله .. لأنك لو بتنغزه هو بس .. راح يصير وضعك مكشوف وبيقولك الشرهة على اللي يسمعلك يا فلان .. لكن السر انك تنتقد نفسك وتنتقد اللي امامك بالتبادل وهذه صعبة ماهي سهلة .. ومثل ما قلت ما تكون عنيف وتحاول تبرز المعطيات بدون تحيز ضد أي جهة .. هنا راح يشعر الطرف الآخر ان تأهبه لمواجهتك ما تسوى عليه لأنه بشويش جالس يفكر بكلامك .. واللين مهم جداً وهي طريقة الرسل من قبلنا وهم أفضل البشر صلوات الله عليهم .. الرسل ما راحوا للناس وقالوا لهم يا جماعة تراكم بتروحون النار كلكم ولا تحاولون لأن هذا مصيركم الخ .. بالعكس الرسل وهم مؤيدين من السماء طبعاً ضربوا المثال في اللين والصبر مثال ذلك سيد البشر محمد صلى الله عليه وسلم .. تقبل الإهانات والمضايقات وغيرها من المشركين ولا دعا عليهم ان الله يزيلهم مع انه كانت دعوته مستجابة مباشرةً وهو أفضل البشر على الإطلاق .. لكنه صبر ودعا لهم .. وحنا مثلنا الأعلى سيد الخلق خاتم الرسل محمد عليه الصلاة والسلام .. ولو اننا عمرنا ما راح نوصل للحياد المثالي ولا للأسلوب الأمثل الخالي من الشحن العاطفي و الحكم المسبق لكن أقلها هو انك تخدم نفسك ودينك بأنه يكون كلامك أقلها مسموع من أحد من الناس ولو واحد أو واحدة ..أهم شي انك تتحدى الميول اللي في قلوب الناس والأهم انك تتحدى نفسك .. تحدى نفسك بأنك اذا جيت تحاسب نفسك وتتكلم معها .. خل أمورك واضحة وفيها حياد .. أنا قصرت ذاك اليوم .. أنا غلطت على الرجال ذاك اليوم .. اعترف لنفسك بكل حياد ونزاهة .. لأنك اذا ماقدرت تعترف لنفسك فأنت ما راح تعترف لربك اللي يدري عنك ولا راح تعترف للناس اللي يهمونك وتهمهم .. عسانا نكون لو نص اللي نطمح له أخوي أبوحمد .. أنا وانت وكل المسلمين .. عسى ربي يزيل الأقفال اللي على قلوبنا ويخلينا نشوف الحق بدون أي فلاتر ..فلاتر من صنعي وصنعك وصنع البشر .. الله يجزاك خير على مداخلتك اللي خلتني أفضفض وأطولها من سيرة .. شاااااااكر لك عزيزي..

شكراً لك يا محمد .. نعم الترجمة راعينا فيها انها تكون جملة لجملة وليست كلمة لكلمة لذلك استهلكت بعض الجهد والوقت ولكن المقال الأصلي لم يكن ذو مفردات صعبة أساسا وكانت حبكته جداً جميلة وتقريباُ يعني جاهز للترجمة.. وبالنسبة للموضوع هذاك قلتها لما كتبت “.. لو أراد فهمنا ..” .. هل يريد فهمنا؟ ليه يفهمنا؟ قد يكون هو موب ملزوم انه يفهمنا لأنه من المعروف انه الضعيف المهزوم هو المطلوب منه اثبات نفسه للقوي الغالب ولا لأ؟ .. والمعطيات واضحة للأسف ولو ما حبيناها .. لكن الثقة بالنفس أيضاً تلعب دور .. الثقة بالنفس ولو كانت على غير سنع إلا أنها تزيل كثير من الحواجز وتزيد من فرص نجاح الشخص ولكن على أرضية غير ثابتة .. ويبقى الموضوع قابل للنقاش .. الشكر لك يا محمد على مداخلتك اللي سمحت لي اني أزيد على الموضوع وأوضح جزء من رأيي ..

حساف ,

هلا بك عزيزي وانا معك والله أذكر أول ما شفت هالصورة اللي أظن انه مستعمل فيها فلتر شدتني لأنها مثل ما ذكرت معطية شعور “سريالي” يوافق الطبيعة السامية والمقدسة لبيت الله الحرام في مكة المكرمة .. الله لا يحرمنا من شوفة الحرم ولا من زيارته دوم ..

أنا متابع تعليقاتك في المدونات الثانية وخصوصاً في المواضيع الجادة السياسية أو الإجتماعية وأبي أقولك شي واحد … استمر … لأن عندك شي ما لقيته عند غيرك, انت تحب انك تحول أي موضوع تناقشه الى معطيات ما فيها أي فلسفة زايدة, يعني أ و ب و ج, ثمين من عقبها تعطي رايك “الغير محايد” ( أمزح ) بطريقة مبهمة وفيها شوية غموض على ما يقولون بدون ما تزعل أحد, ثمين ترجع وتحول الموضوع للطرف الثاني وكنك ما سويت شي ويطلع شكلك كنك صدق ما اعطيت رايك……. أمزح لا تزعل مني بس قصدي انك زابط فكرة “مسيرة الحياد” حقتك بطريقة او باخرى ……. مدري هي طلعت معك كذا ولا انت تعبت عشان ما تأثر عليك ميولك في اراءك؟ لأن ما في شخص محايد ومرتاح ولا انت وش رايك؟؟؟؟ انه يكون عندك موقفك الواضح ومع كذا تصبر عليه وتدور حوله لفة ولفتين ودورة عشان ما تخسر رأي ولا اهتمام اللي يناقشك, انا بالنسبة لي هذا هو الحياد الواقعي, وانت عندك منه لكنك نادر ما تعطي رايك في امور كثيرة فياريت نشوف المحايد يتجلى ويعلمنا وشلون نقدر نصير محايدين وبنفس الوقت نكون مع ميولنا الطبيعية .. انا هذي تحليلي عنك من قراءة او قراءتين لتعليقاتك في مدونة شاي اخضر وغيرها من المدونات ولمواضيعك اظن فسامحني اذا تسرعت واعتبرني ضيف دائم عندك باذن الله